Ein hystafelloedd
Y swyddfa gofrestru
Mae hon yn ystafell fach y mae digon o le ar gyfer y cwpwl a dau dyst.
Ystafell y Seremoni
Hon yw ein hystafell fwy y mae digon o le i 56 o westeion eistedd ynddi.
Gallwch chi ddod o hyd i’r wybodaeth am brisiau ein hystafelloedd ar ein tudalen ‘trefnu cofrestrydd ar gyfer eich seremoni’.
Talu am dystysgrif
Gofynnwn i daliadau am dystysgrifau gael eu gwneud ar yr un adeg â ffi seremoni’r cofrestrydd (ni fyddwn yn trafod hyn gyda chi nes byddwch wedi rhoi eich hysbysiad cyfreithiol).
Gallwch dalu am dystysgrifau priodas ar gyfer seremonïau priodas sydd i ddod drwy ein e-siop, neu drwy ffonio 01978 298997 (cerdyn debyd neu gredyd) - y pris yw £11.
Tystion
Mae angen dau dyst yn ôl y gyfraith a gallan nhw fod yn ffrindiau neu'n berthnasau.
Dylai pob tyst fod yn 16 oed neu’n hŷn. Mae’n bosib i bobl iau fod yn dystion ond byddai’n rhaid i’r cofrestrydd gytuno â hyn cyn cynnal y seremoni (cysylltwch â’n swyddfa gofrestru).
Mae’n rhaid i dystion fod yn bresennol drwy gydol y seremoni ac mae’n rhaid iddyn nhw ddeall yr iaith sy’n cael ei defnyddio yn y seremoni.
Mae seremonïau fel arfer yn cael eu cynnal yn Saesneg, fodd bynnag, gan fod Wrecsam yn Ardal Gofrestru Gymraeg, mae’n bosib i chi ddewis cynnal y seremoni yn Gymraeg. Yn yr achos hwn, byddai’n rhaid i’ch tystion ddeall Cymraeg.
Os nad ydych chi na’ch partner yn gallu siarad Cymraeg na Saesneg, mae’n rhaid i un o’ch tystion allu dehongli’r seremoni yn gywir i chi.
Mae hwn yn ofyniad cyfreithlon oherwydd mae’n rhaid i chi ddeall y cytundeb yr ydych chi’n ymrwymo iddo dan gyfreithiau priodas y wlad hon.
Cyrraedd y swyddfa gofrestru
Trefnwch eich bod chi’n cyrraedd gyda'ch gwesteion o leiaf 15-20 munud cyn yr amser y mae disgwyl i’r seremoni ddechrau.
Pan fyddwch chi’n cyrraedd, byddwch chi’n cael eich arwain i’r ardal aros.
Dylech chi ganiatáu digon o amser rhag ofn y bydd oedi i draffig a chofiwch nad oes modd i ni ohirio dechrau'r seremoni ar gyfer unrhyw hwyrddyfodiaid.
Y seremoni briodasol yn y swyddfa gofrestru
Dyma ein seremoni sylfaenol y mae’n rhaid i chi ddweud yr addunedau statudol a llofnodi’r atodlen.
Y seremoni briodasol yn Ystafell y Seremoni
Fymryn cyn y seremoni, bydd y cofrestrydd yn cyfweld â’r ddau ohonoch chi’n breifat i gadarnhau’r manylion i gael eu cofnodi yn yr atodlen briodas.
Bydd y cofrestrydd arolygol yn croesawu eich gwesteion i’r briodas ac yna’n gofyn i chi’ch dau ailadrodd y ddau ddatganiad sy’n ofynnol yn ôl y gyfraith. Bydd y cofrestrydd arolygol yn eich arwain chi drwy bopeth sydd angen i chi ei wneud a’i ddweud.
Dewisiadau seremonïau personol
Mae’n bosib i chi gyfnewid modrwy/modrwyau neu roddion a chynnwys darlleniadau, barddoniaeth a cherddoriaeth yn rhan o’ch seremoni os ydych chi’n dymuno.
Gallwch chi gael cerddoriaeth yn chwarae cyn dechrau’r seremoni ac yn ystod llofnodi’r atodlen (mae gennym ni seinydd Bluetooth y gallwch chi gysylltu iddo i wneud hyn).
Noder, dan y Ddeddf Priodasau, ni chaniateir darlleniadau na cherddoriaeth grefyddol mewn seremoni sifil.
Mae llawer o gyplau’n dewis cynnwys cyfnewid modrwy/modrwyau yn rhan draddodiadol o'u seremoni briodas, ond nid yw hyn yn rhan hanfodol o'r seremoni.
Weithiau mae cyplau’n gofyn am gael llun o aelod o’r teulu sydd wedi marw yn y seremoni, ac rydym ni’n caniatáu hyn.
Ar ôl gwneud y datganiadau
Bydd y cofrestrydd arolygol yn cyhoeddi eich bod chi wedi priodi ar yr adeg hon. Byddwch chi a’ch tystion yn llofnodi’r atodlen ac yna gallwch chi dynnu lluniau.
Recordio fideo a chamerâu
Mae croeso i chi drefnu i weithredydd fideo a/neu ffotograffydd fod yn bresennol yn eich seremoni, ond mae’n rhaid iddyn nhw gadw at y rheolau y mae’r swyddogion cofrestru sydd ar ddyletswydd ar y diwrnod yn eu nodi.
Lluniau
Pan fydd yr holl ofynion cyfreithiol wedi’u cwblhau, bydd cyfle i dynnu lluniau, gan gynnwys y llun 'smalio arwyddo’r gofrestr' traddodiadol.
Gallwch chi hefyd gael lluniau wedi’u tynnu y tu allan i flaen Neuadd y Dref ar Lwyn Isaf a’r Bandstand, os ydych chi’n dymuno.
Conffeti
Noder ein bod ni’n caniatáu conffeti y tu allan ond gofynnwn eich bod chi’n dewis math bioddiraddadwy - dylech chi osgoi plastig a ffoil. Rydym ni’n argymell eich bod chi’n defnyddio conffeti naturiol wedi’i wneud o flodau neu berlysiau.