Os ydych chi’n ddarparwr gofal plant sy’n gweithio yn Wrecsam, gallwch ymgeisio i ddarparu Cynnig Gofal Plant Cymru (bydd angen i chi fod wedi cofrestru ag Arolygiaeth Gofal Cymru’n gyntaf).
Sut mae’r gofal plant yn cael ei ddarparu drwy’r cynnig?
Yn ystod y tymor, fel darparwr gofal plant, gallwch ddarparu hyd at 20 awr o ofal plant wedi’i ariannu bob wythnos i rai 3 mlwydd oed sy’n gymwys i gael Addysg Gynnar, a 17.5 awr o ofal plant wedi’i ariannu bob wythnos i blant 3 a 4 oed sy’n gymwys i gael Addysg Feithrin yn y Cyfnod Sylfaen. Gall plant gael y cyllid am hyd at 48 wythnos y flwyddyn. Os nad ydych chi’n darparu gofal gwyliau, gall y rhiant/gofalwr ddefnyddio’r cyllid ar gyfer yr wythnosau gwyliau mewn lleoliad gofal plant arall.
Gall plant gael hyd at 9 wythnos o 30 awr o ofal plant yn ystod gwyliau’r ysgol. Mae hyn yn cael ei gyfrifo pro-rata.
Sut mae’r cynnig yn cael ei ariannu?
Mae’r cynnig yn cael ei ariannu gan Lywodraeth Cymru. Y gyfradd ar gyfer y cynnig yw £4.50 yr awr ar gyfer pob math o ddarpariaeth ac mae’n cael ei dalu’n fisol yn uniongyrchol i’ch lleoliad.
Cyllid i Gefnogi Anghenion Dysgu Ychwanegol
Mae yna gyllid pellach ar gael i blant gydag anghenion ychwanegol sy’n manteisio ar y Cynnig Gofal Plant. Gall y cyllid hwn gael ei ddefnyddio at amrywiaeth o ddibenion i alluogi’r plentyn i gael darpariaeth gofal plant, fel cadeiriau neu gyfarpar chwarae wedi’u haddasu, adnoddau eraill neu hyfforddi staff. Gallai fod hefyd i aelod ychwanegol o staff roi cymorth i’r plentyn.
Dylid cyflwyno ceisiadau i’r Panel Seibiant Anabledd a Gofal Plant.
Sut gallaf i gofrestru fy lleoliad gofal plant?
Gallwch gofrestru i dderbyn plant o Wrecsam, yn ogystal ag o siroedd eraill Cymru (er bod angen cais ar wahân ar gyfer pob sir).
Os hoffech chi gofrestru i ddarparu’r Cynnig Gofal Plant, neu os oes arnoch angen help neu wybodaeth bellach, cysylltwch â’r Tîm Gofal Plant yng Ngwasanaeth Gwybodaeth i Deuluoedd Wrecsam trwy anfon e-bost at childcareteam@wrexham.gov.uk neu drwy ffonio 01978 292094.
