Rydym ni (Cyngor Bwrdeistref Sirol Wrecsam) yn awyddus i benodi person lleyg i’n Pwyllgor Llywodraethu ac Archwilio. 

O fis Mai 2022 ymlaen, bydd y Pwyllgor Llywodraethu ac Archwilio yn cael ei gadeirio gan aelod lleyg. Mae lleygwyr yn aelodau annibynnol o’r cyhoedd.

Gallai hon fod yn rôl i chi os oes gennych ddiddordeb neu brofiad ym maes llywodraethu, archwilio, perfformiad neu reoli risg ac os hoffech ein helpu ni i sicrhau ein bod yn cael ein llywodraethu’n effeithiol.

Diffiniad o leygwr

Ar gyfer y rôl hon, mae lleygwr yn golygu nad yw’r person:

1. Yn aelod nac yn swyddog mewn unrhyw awdurdod lleol,
2. Ar unrhyw adeg yn y cyfnod o ddeuddeng mis yn gorffen ar ddyddiad y penodiad wedi bod yn aelod nac yn swyddog mewn unrhyw awdurdod lleol, nac
3. Yn briod nac yn bartner sifil i aelod neu swyddog mewn unrhyw awdurdod lleol.

Pwrpas y pwyllgor

Mae’r pwyllgor statudol hwn yn rhan allweddol o fframwaith llywodraethu a rhaglen wella’r awdurdod lleol.  

Mae’r pwyllgor yn darparu sicrwydd annibynnol ar:

• ddigonolrwydd ac effeithiolrwydd y fframwaith rheoli risg
• yr amgylchedd rheoli mewnol
• uniondeb y prosesau adrodd ariannol a llywodraethu  
• asesu perfformiad
• delio â chwynion 

Drwy oruchwylio’r gwaith archwilio mewnol ac allanol, mae’n helpu i sicrhau bod trefniadau sicrwydd effeithiol yn eu lle.

Tâl (cydnabyddiaeth ariannol)

Mae’r pwyllgor yn cyfarfod sawl gwaith y flwyddyn ac mae aelodau lleyg yn cael eu talu am roi eu hamser.  

Mae’r tâl yn unol â’r cyfraddau mae Panel Annibynnol Cymru ar Gydnabyddiaeth Ariannol yn eu pennu.