Mae Parc Gwledig Dyffryn Moss wedi’i leoli rhwng Gwersyllt a Brynteg, dair milltir i’r gogledd o Wrecsam. Mae gan y dyffryn siâp ‘V’ goetir o goed derw a ffawydd, yn ogystal â dau lyn bach ac ardaloedd o laswelltir agored. Mae’r dyffryn yn gynefin llawn bywyd gwyllt ac mae’n arbennig o nodedig am ei adar.

Mae gan Ddyffryn Moss orffennol diwydiannol ac roedd yn arfer bod yn ardal lofaol fawr. Yn 1973 cafodd y tomenni gwastraff eu hadfer, ond ymysg y coetir a'r dolydd llonydd, mae tystiolaeth hyd heddiw o’r hen reilffyrdd a oedd yn arfer bod yno.

Mae llwybrau cerdded y parc yn aml yn dilyn hen dramffyrdd a rheilffyrdd a oedd yn arfer cael eu defnyddio i echdynnu glo a thywodfaen o’r dyffryn. Er bod y pyllau glo wedi hen fynd, mae’r chwareli tywodfaen bach yn dal yno ac yn cynnig cynefinoedd rhagorol i fywyd gwyllt yn guddiedig ymysg y coed.

Clwb Pysgota Dyffryn Moss yn defnyddio’r llyn ger y prif faes parcio (gyda'r maes chwarae) oddi ar Ffordd yr Aber. Y lleoliad what3words yw ///dyddiol.mamiaith.telynor (dolen gyswllt allanol). Mae what3words yn darparu ‘cod’ yr union leoliad, gan ddefnyddio geiriau ar hap, i helpu pobl i ddod o hyd i leoliadau pan nad yw cyfeiriadau stryd yn ddigon cywir). Mae tocynnau dydd neu aelodaeth flynyddol ar gael i'w prynu yn siop Morrisons Tackle, Stryt y Marchog, Wrecsam, LL13 8DW.

Gall marchogwyr / beicwyr ddefnyddio’r llwybr ar hyd yr hen reilffordd. 

Fideo Parc Gwledig Dyffryn Moss ar YouTube (dolen gyswllt allanol)

Ni chaniateir hedfan dronau ym mharciau Wrecsam.

Parcio ceir

Mae dau faes parcio ger y llynnoedd. Mae'r meysydd parcio yn rhad ac am ddim ac maent wedi'u lleoli ar naill ochr Ffordd yr Aber. Cod post: LL11 4UR.

Nid oes tai bach na chaffi yn y parc.

Cŵn

Mae croeso i gŵn ym Mharc Dyffryn Moss ond dylid eu cadw dan reolaeth bob amser. Cofiwch bod methu â chodi baw eich cŵn yn drosedd ddifrifol a gallech wynebu dirwyon.

Teithiau Cerdded

Mae dwy daith gerdded sy’n mynd ar hyd llwybrau cylch ac mae grisiau a rhywfaint o dir anwastad, llethrau neu rannau cul ar hyd y llwybrau.

Taith gerdded trwy’r coetir ar ben y dyffryn

1. Os dechreuwch yn y maes parcio, ar draws y ffordd i’r ardal chwarae fe welwch risiau yn mynd trwy’r coetir. Dringwch y grisiau a throwch i’r chwith ar y top.

2. Wrth ddilyn y llwybr hwn fe welwch dystiolaeth o waith chwarel hanesyddol bob hyn a hyn ar y dde, ac os edrychwch i'r chwith cewch gipolwg o'r llyn oddi tanoch trwy'r coed. Ewch i fyny’r  grisiau a daliwch i fynd i’r chwith ar hyd y trac trwy’r coetir.

3. Nesaf fe ddowch at risiau sy’n mynd â chi i lawr i waelod y dyffryn. Ewch i lawr a throwch i’r dde ar hyd y llwybr, croeswch y bont ac yna ewch ar hyd y llwybr sy’n ystumio i’r dde gan fynd heibio’r fainc ac i fyny’r arglawdd.

4. Ar ben yr arglawdd trowch i’r chwith ar hyd llwybr llydan sy’n crafu pen y dyffryn. Dilynwch y llwybr hwn nes i chi gyrraedd lôn gul. Byddwch yn ofalus o gerbydau sy’n pasio wrth i chi droi i’r chwith a dilynwch y lôn hon i lawr y bryn nes i chi weld y maes parcio lle dechreuoch y daith gerdded.

Taith yr Hen Reilffordd 

1. Gan ddechrau yn y prif faes parcio, gyda’r llyn pysgota o’ch blaenau, cerddwch i’r chwith trwy'r atalfa fetel. Arhoswch ar y llwybr agosaf at y llyn, croeswch y cored dros y bont fach.

2. Daliwch i fynd i lawr ochr y llyn at y gornel ac wrth edrych i'r chwith fe welwch risiau serth. Dringwch y grisiau a throwch i’r chwith ar y top, fe ddowch ar draws un o’r pontydd rheilffordd.

3. Cerddwch o dan y bont reilffordd, trowch i’r chwith i fyny’r grisiau a dilynwch y llwybr yn ôl i ben y bont.

4. Cerddwch i’r chwith ar hyd y llwybr a chroeswch y bont fach. Dilynwch y llwybr hwn nes i chi gyrraedd y diwedd.

5. Ble daw’r llwybr i ben wrth y ffens fetel, trowch i’r dde i lawr i’r coetir, yna trowch yn syth i’r chwith ar y ffordd ger pont fach.

6. Byddwch yn ymwybodol o gerbydau sy’n pasio wrth i chi gerdded i lawr y ffordd yn ôl i’ch man cychwyn yn y prif faes parcio.

Cyfeillion Dyffryn Moss

Mae gan ‘Ddyffryn Moss grŵp cyfeillion’ gweithredol sy’n cyfarfod yn rheolaidd ac yn gweithio ochr yn ochr â’r staff i wella a chynnal a chadw’r parc ar gyfer ei holl ddefnyddwyr. Bob mis mae’r grŵp yn cyfarfod yn y parc i wneud tasgau cadwraeth ymarferol.  

Am fwy o wybodaeth gallwch e-bostio countryparks@wrexham.gov.uk neu ewch i’w tudalen Facebook: Cyfeillion Dyffryn Moss (dolen gyswllt allanol).

Cyfeiriad / cyfarwyddiadau

Parc Gwledig Dyffryn Moss 
Ffordd yr Aber
Moss
Wrecsam
LL11 4UR 

Gadewch yr A483 wrth droad yr Wyddgrug. Wrth y gylchfan trowch i Ffordd Brynhyfryd, a dilynwch yr arwyddion melyn i Gwrs Golff Dyffryn Moss. Yna cymerwch y trydydd troad i’r chwith ar hyd Ffordd yr Aber. Parciwch rhwng y llynnoedd.

Cysylltwch â ni

Ebost: countryparks@wrexham.gov.uk (dydd Llun i ddydd Gwener)