Deddf Etholiadau 2022
Mae Llywodraeth y DU wedi pasio deddf a fydd yn newid y ffordd rydych yn pleidleisio mewn Etholiadau Seneddol ac Etholiadau Comisiynwyr yr Heddlu a Throsedd. Enw’r ddeddf yw Deddf Etholiadau 2022.
Nid yw’r ddeddf hon yn berthnasol i Etholiadau Senedd Cymru, Cyngor Bwrdeistref Sirol Wrecsam na’r Cynghorau Cymuned. Caiff y ddeddfwriaeth ar gyfer y rhain ei gosod gan Lywodraeth Cymru.
Pleidleisio mewn gorsafoedd pleidleisio
O Fai 2023, fe fydd angen i chi ddangos ffurf wedi ei chymeradwyo o brawf adnabod â llun mewn gorsafoedd pleidleisio pan fo etholiadau Seneddol neu etholiadau Comisiynwyr yr Heddlu a Throsedd.
Pa brawf adnabod â llun y gallwch chi ei ddefnyddio
Mae’n rhaid i chi ddangos ffurf wedi ei chymeradwyo o brawf adnabod â llun, fel pasbort neu drwydded yrru.
Dim ond dogfennau gwreiddiol a gaiff eu derbyn. Ni fydd lluniau sydd wedi eu sganio neu gopïau yn cael eu derbyn.
Os yw eich prawf adnabod â llun wedi dirwyn i ben, fe fydd yn cael ei dderbyn os yw’r llun yn dal i fod yn debyg i chi.
Mae’r ffurfiau mwyaf cyffredin a gaiff eu defnyddio a’u derbyn o brawf adnabod yn cynnwys:
- Pasbort a gyhoeddwyd gan y DU, unrhyw un o Ynysoedd y Sianel, Ynys Manaw, Tiriogaeth Dramor Brydeinig, statws Ardal Economaidd Ewropeaidd neu un o wledydd y Gymanwlad.
- Trwydded yrru gyda llun a gyhoeddwyd gan y DU, Ynysoedd y Sianel, Ynys Manaw, gwladwriaeth Ardal Economaidd Ewropeaidd neu un o wledydd y Gymanwlad.
- Cerdyn adnabod â llun Ardal Economaidd Ewropeaidd
- Cerdyn adnabod sydd â hologram y Cynllun Safonau Profi Oedran
- Bathodyn Glas
- Cerdyn Bws Unigolyn Hŷn
- Cerdyn Bws Unigolyn Anabl
- Cerdyn Oyster 60+
Os nad ydych yn sicr p’run ai yw’r ffurf o brawf adnabod â llun sydd gennych ar hyn o bryd yn cael ei dderbyn, mae rhagor o wybodaeth ar y ffurfiau o brawf adnabod a gaiff eu derbyn ar wefan GOV.UK (dolen gyswllt allanol).
Fel arall, fe allwch gysylltu â’n tîm Gwasanaethau Etholiadol i gael cymorth.
Beth i’w wneud os nad oes gennych chi ffurf o brawf adnabod sydd wedi’i chymeradwyo
Os nad oes gennych chi ffurf o brawf adnabod sydd wedi’i chymeradwyo, fe fydd angen i chi wneud cais am Dystysgrif Awdurdod Pleidleisiwr rhad ac am ddim.
Gallwch wneud cais ar-lein am Dystysgrif Awdurdod Pleidleisiwr drwy wefan GOV.UK (dolen gyswllt allanol).
Gallwch wneud cais am Dystysgrif Awdurdod Pleidleisiwr drwy argraffu a llenwi ffurflen bapur a’i hanfon at ein tîm Gwasanaethau Etholiadol. Gallwch hefyd anfon e-bost neu ffonio ein tîm Gwasanaethau Etholiadol i ofyn am gopi papur o’r ffurflen hon.
Unwaith y byddwch wedi derbyn eich Tystysgrif Awdurdod Pleidleisiwr, ni fydd ganddo ddyddiad terfyn. Fodd bynnag, fe’ch cynghorir i adnewyddu eich Tystysgrif Awdurdod Pleidleisiwr ymhen 10 mlynedd i sicrhau fod y llun yn parhau yn wirioneddol debyg i chi.
Y dyddiad cau i wneud cais am Dystysgrif Awdurdod Pleidleisiwr fydd 5pm, chwe diwrnod gwaith cyn dyddiad yr etholiad.
Yr etholiad nesaf fydd yn Wrecsam lle bydd angen i chi ddangos prawf adnabod â llun neu Dystysgrif Awdurdod Pleidleisiwr er mwyn pleidleisio fydd Etholiad Comisiynydd yr Heddlu a Throsedd ym Mai 2024.
Pleidleisio drwy'r post neu drwy ddirprwy
Os ydych yn dewis pleidleisio drwy’r post, ni fyddwch yn cael eich effeithio a byddwch yn cael eich papurau pleidleisio post fel arfer.
Os ydych yn dewis pleidleisio drwy ddirprwy, yna bydd rhaid i’r unigolyn yr ydych wedi ymddiried ynddynt i bleidleisio ar eich rhan fynd â’u prawf adnabod â llun eu hunain. Os nad oes ganddynt brawf adnabod â llun yna ni fyddant yn cael y papur pleidleisio.
Pleidleisiau post
Yn hytrach na mynd i’ch gorsaf bleidleisio fe allwch wneud cais i gael pleidlais bost. Mae Pleidleisiau Post ar gael i bawb a gellir eu hanfon i unrhyw gyfeiriad, hyd yn oed dramor, ond cadwch mewn cof fod rhaid i’ch papur pleidleisio gael ei ddychwelyd i ni cyn i’r gorsafoedd pleidleisio gau ar ddiwrnod yr etholiad.
Lawrlwythwch y ffurflen gais i gael pleidlais drwy’r post ar wefan y Comisiwn Etholiadol (dolen gyswllt allanol).
Pleidleisio drwy ddirprwy
Os na allwch fynd i'r orsaf bleidleisio ar ddiwrnod yr etholiad gallwch wneud cais i gael pleidlais drwy ddirprwy: ystyr hynny yw pan rydych yn penodi rhywun i bleidleisio ar eich rhan. Mae'r unigolyn hwnnw wedyn yn mynd i'r orsaf bleidleisio ac yn bwrw eich pleidlais.
Y dyddiad cau ar gyfer derbyn eich ffurflen gais yw chwe diwrnod cyn diwrnod yr etholiad (heb gynnwys penwythnosau a gwyliau banc). Mewn rhai amgylchiadau, pan fo argyfwng sy'n golygu na allwch fynd i'r orsaf bleidleisio'n bersonol, gallwch wneud cais am bleidlais drwy ddirprwy mewn argyfwng hyd at 5pm ar y diwrnod pleidleisio.
Lawrlwythwch y ffurflenni cais i gael pleidlais drwy ddirprwy ar wefan y Comisiwn Etholiadol (dolen gyswllt allanol).
Pleidleisio drwy'r post drwy ddirprwy
Os nad yw eich dirprwy yn mynd i fod gartref ar ddiwrnod yr etholiad, yna fe allwch wneud cais am i'w papur pleidleisio drwy ddirprwy gael ei bostio atynt.
Y dyddiad cau ar gyfer derbyn eich ffurflen gais yw chwe diwrnod cyn diwrnod yr etholiad (heb gynnwys penwythnosau a gwyliau banc).
Dychwelyd eich ffurflenni cais
Mae'n rhaid i chi ddychwelyd eich ffurflenni cais drwy'r post/drwy ddirprwy i'r cyfeiriad canlynol:
Y Gwasanaethau Etholiadol, Neuadd y Dref, Wrecsam, LL11 1AY.
Newidiadau i bleidleisio drwy'r post a phleidleisio drwy ddirprwy - byddwch yn ymwybodol
Mae'r newidiadau a nodir isod yn berthnasol i'r etholwyr hynny sy'n ystyried gwneud cais i bleidleisio drwy'r post neu’n ystyried penodi rhywun i bleidleisio ar eu rhan, a elwir yn ddirprwy.
Newidiadau pellach i’r system etholiadol
Mae llywodraeth y DU yn gwneud newidiadau eraill i system etholiadol y DU hefyd. Caiff y rhain i gyd eu cynnwys yn y Ddeddf Etholiadau.
I gael rhagor o wybodaeth am y ddeddf hon fe allwch ymweld â gwefan y Comisiwn Etholiadol (dolen gyswllt allanol).
Cysylltwch â ni
Os oes angen cymorth arnoch gyda’ch cais cysylltwch â ni.
Y Gwasanaethau Etholiadol
Neuadd y Dref
Wrecsam
LL11 1AY
E-bost: electoral@wrexham.gov.uk
Rhif ffôn: 01978 292020