Os ydych chi’n rhiant sy’n gweithio, yn byw yn Wrecsam ac yn bodloni’r meini prawf cymhwyso, gallwch wneud cais ar gyfer Cynnig Gofal Plant Llywodraeth Cymru i blant tair a phedair blwydd oed.

Mae’r cynnig ar gael i blant o ddechrau’r tymor yn dilyn eu pen-blwydd yn dair oed nes mis Medi ar ôl iddynt droi’n bedair oed.

Mae’n golygu y gallwch gael hyd at 30 awr o ofal plant bob wythnos wedi’i gyfuno ag addysg gynnar neu feithrinfa cyfnod sylfaen, oll wedi’i ariannu gan y Llywodraeth.

I fanteisio ar y cynnig bydd arnoch angen gwneud cais ar wahân am addysg gynnar neu feithrinfa cyfnod sylfaen, yn ogystal â gwneud cais am ofal plant drwy Sir y Fflint.

Mae’r Cynnig yn cynnwys gofal plant wedi’i gyfuno ag addysg ar gyfer plant tair a phedair blwydd oed (Addysg Gynnar wedi’i Hariannu a Meithrinfeydd Cyfnod Sylfaen). At ei gilydd mae’r lwfansau’n talu am hyd at 30 awr yr wythnos. 

Mae Addysg Gynnar wedi’i Hariannu ar gael yn nhymhorau’r gwanwyn a’r haf i blant sy’n cael eu pen-blwydd yn dair oed rhwng 1 Medi a dechrau tymor yr haf.

Mae darpariaeth feithrin y Cyfnod Sylfaen ar gael gydol y tri thymor ar gyfer plant sy’n cael eu pen-blwydd yn dair oed ar 31 Awst neu cyn hynny. 

Er bod y cynnig gofal plant ar gael am hyd at 48 wythnos o’r flwyddyn, caiff 39 o’r rheiny eu trin fel adeg tymor. Ymdrinnir â’r naw wythnos arall fel rhai y tu allan i’r tymor, neu ‘wythnosau gwyliau’. Mae nifer yr wythnosau gwyliau y gall pob plentyn ei gael yn dibynnu ar ba bryd yn ystod y flwyddyn academaidd y dechreuodd y plentyn elwa ar y Cynnig. Yn ystod yr wythnosau gwyliau hyn ni fydd plant ond yn derbyn 30 awr o ofal plant bob wythnos.