Nodiadau Cyfarwyddyd Ar Gyfer Ymgeiswyr

Croeso i nodiadau cyfarwyddyd ar gyfer ymgeiswyr swyddi Cyngor Bwrdeistref Sirol Wrecsam. Mae’r dudalen hon yn cynnwys cyngor a chyfarwyddyd defnyddiol i’ch cynorthwyo’n y broses o ymgeisio am swydd gyda’r Cyngor.

Eich Ffurflen Gais

Mae eich ffurflen gais yn hynod bwysig. Dyma’r unig wybodaeth y byddwn yn ei defnyddio i benderfynu a fyddwch yn cael eich gosod ar y rhestr fer ar gyfer cyfweliad. Ni fydd unrhyw wybodaeth flaenorol amdanoch na chais blaenorol sydd gennym yn cael ei hystyried.

Rhennir y ffurflen yn 16 rhan. Nid oes angen esboniad ar gyfer y rhan fwyaf o’r ffurflen ac ni chynhwysir nhw yn y nodiadau hyn. Fodd bynnag, rydym wedi cynnwys canllaw ac esboniadau ar gyfer y rhannau mwyaf manwl, er enghraifft, y wybodaeth sydd ei hangen ar gyfer Deddf Ailsefydlu Troseddwyr (1974).

Os ydych yn dymuno cwblhau ffurflen gais ar-lein, bydd angen i chi ddarparu cyfeiriad ebost a chyfrinair er diogelwch. Bydd hyn yn eich galluogi i ddechrau cyfrif ymgeisio gyda’r Cyngor a’ch galluogi i gwblhau eich ffurflen gais unrhyw amser cyn dyddiad cau’r swydd rydych yn ymgeisio amdani.

Gellwch arbed eich ffurflen gais ar unrhyw adeg ac yna ailagor y ffurflen pan fyddwch yn ymweld â’r safle, trwy arwyddo gyda’ch cyfeiriad ebost a chyfrinair. Os byddwch wedi anghofio eich cyfrinair, gallwn anfon un newydd atoch drwy’r ebost.

Ni chodir tâl am y cyfleuster hwn ac ni fyddwn yn defnyddio unrhyw wybodaeth rydych wedi’i chyflwyno hyd nes i chi gwblhau eich ffurflen gais a’i hanfon i’r Cyngor.

Dalier Sylw: Nid yw anfon Curriculum Vitae yn lle cwblhau ffurflen gais yn dderbyniol, ond mae croeso i chi atodi eich C.V. at y ffurflen gais a gwblhawyd.

^ yn ôl i'r brig

Swydd Ddisgrifiad a Manylion yr Unigolyn

Mae gan bob swydd wag Swydd Ddisgrifiad a Manylion yr Unigolyn.

Mae’r Swydd Ddisgrifiad yn esbonio beth yw gofynion y swydd ac yn rhestru’r prif dasgau a dyletswyddau y mae disgwyl i ddeilydd y swydd eu gwneud.

Mae Manylion yr Unigolyn yn nodi pa gymwysterau, sgiliau, gwybodaeth a phrofiad a fydd eu hangen ar ddeilydd y swydd. Rhestrir y rhain fel meini prawf ‘hanfodol’ neu ‘ddymunol’.

Bydd raid i chi gwrdd ag o leiaf y meini prawf hanfodol i gael gwahoddiad i ddod i gyfweliad.

Rhestr Fer

Fel arfer, y rheolwr sy’n gyfrifol am y swydd sy’n penderfynu pa ymgeiswyr a fydd yn cael gwahoddiad i fynychu cyfweliad. Gelwir y broses hon yn ‘rhestr fer’. Os yw eich profiad, sgiliau a chymwysterau’n cyd-fynd â’r meini prawf a nodwyd yn Manylion yr Unigolyn, mae’n bur debyg y cewch eich cynnwys ar y rhestr fer. Ni ystyrir y wybodaeth a nodir ar y ffurflen Monitro Cyfle Cyfartal.

Y Ffurflen Monitro Cyfle Cyfartal

Gofynnir i chi gwblhau Ffurflen Monitro Cyfle Cyfartal i’n helpu ni i fonitro a gwella effeithiolrwydd ein Polisi Cyfle Cyfartal. Datgysylltir hon oddi wrth eich ffurflen gais a’i chadw ar wahân yn gynnar yn y broses recriwtio.

Os ydych chi’n unigolyn ag anableddau o dan ddarpariaethau Deddf Anffafrio’r Anabl 1995 ac mae gennych y cymwysterau a’r profiad a nodwyd yn Manylion yr Unigolyn, byddwch yn cael eich cynnwys ar y rhestr fer yn awtomatig ar gyfer cyfweliad.

^ yn ôl i'r brig

Cwblhau’r Ffurflen Gais

1. Manylion y Swydd Wag

Cwblheir yr adran hon yn awtomatig gyda manylion y swydd wag rydych yn ymgeisio amdani.

2. Manylion Personol

Bydd angen i ni wybod pwy ydych chi a sut gallwn gysylltu â chi. Cwblhewch eich enw llawn, cyfeiriad, eich dewis o deitl a rhifau ffôn cyswllt (rhif cartref, gwaith ac os yn bosibl, eich ffôn symudol.

Gofynnwn hefyd os oes gennych drwydded yrru lawn. Mae hyn yn bwysig os yw’r swydd rydych yn gwneud cais amdani yn gofyn am yrrwr cerbyd.

3. Manylion Geni/ Cenedligrwydd

Cwblhewch y manylion megis eich dyddiad geni a’ch dinasyddiaeth.

4. Manylion Cyflogaeth Bresennol

Rhowch fanylion eich swydd bresennol, gan gynnwys eich man gwaith, disgrifiad byr o’ch dyletswyddau, pa mor hir rydych wedi gweithio yno a’ch rheswm dros adael. Os nad oes gennych swydd ar hyn o bryd, gadewch yr adran hon yn wag.

5. Absenoldebau o’r Gwaith

Os ydych wedi bod yn absennol o’r gwaith oherwydd salwch yn ystod y tair blynedd ddiwethaf, rhestrwch y niferoedd o weithiau a chyfanswm y dyddiau. Nid oes rhaid i chi ddweud pam eich bod yn absennol, ond mae bwlch ar gael os ydych am nodi pam.

6. Swyddi Blaenorol

Rhestrwch eich cyflogwyr blaenorol yn ôl trefn amser, gan ddechrau â’r diweddaraf. Cofiwch nodi teitl eich swydd ac ar gyfer swyddi mwy diweddar, eich gradd a chyflog. Cofiwch wirio bod y dyddiadau hyn yn gywir ac yn y drefn gywir!

7. Toriadau mewn Cyflogaeth

Unwaith eto, dylech ddechrau â’r diweddaraf, gan roi manylion a dyddiadau unrhyw doriadau o’r gwaith am ba bynnag reswm (e.e., gwaith gwirfoddol, rhesymau cartref, teithio, meddygol).

8. Cymwysterau Addysgol, Proffesiynol a Galwedigaethol (diweddaraf yn gyntaf)

Mae’n rhaid i chi ddangos bod gennych y cymwysterau hanfodol ar gyfer y swydd. Nodwch eich holl gymwysterau, gan gynnwys y graddau/lefelau a lle y gwnaethoch astudio amdanynt. Sicrhewch eich bod yn nodi unrhyw gymwysterau proffesiynol (lle mae’n rhaid i chi fod yn aelod o gorff proffesiynol – gweler Rhan 9).

Os cawsoch eich cymwysterau dramor, bydd raid i chi gael tystiolaeth i ddangos eu bod gyfwerth â’r cymwysterau sy’n hanfodol ar gyfer y swydd. Os bydd angen cymorth arnoch gyda hyn, ffoniwch UKNARIC ar 01242 260010.

Gallwch ddefnyddio’r adran hon hefyd i nodi unrhyw gyrsiau hyfforddi rydych wedi’u cwblhau a all fod yn ddefnyddiol ar gyfer y swydd hon (e.e. Hyfforddiant Cymorth Cyntaf yn y Gweithle, Cwrs Pendantrwydd, hyfforddiant y cyflogwr).

9. Aelodaeth o Gyrff Proffesiynol

Os yw’r swydd yn gofyn am gymhwyster proffesiynol fel maen prawf hanfodol neu ddymunol ac mae’r cymhwyster gennych eisoes (neu rydych yn astudio amdano), rhestrwch y corff aelodaeth, math o aelodaeth, teitl eich cymhwyster a’r dyddiad yr enillwyd ef gennych.

Os oes gennych gymwysterau proffesiynol na restrir yn Manylion yr Unigolyn, gellwch ddefnyddio’r adran hon i’w cynnwys os ydych yn credu eu bod yn berthnasol.

10. Profiad a Gwybodaeth Arall

Dyma ran bwysicaf eich cais. Ceisiwch gydweddu eich sgiliau, gwybodaeth a phrofiad â’r gofynion a nodwyd yn Manylion yr Unigolyn.

Efallai byddai defnyddio’r meini prawf hanfodol/dymunol fel penawdau o gymorth i chi. Nodwch eich hanes gyrfaol yn fras o dan y penawdau hyn. Yn lle dweud eich bod wedi gwneud rhywbeth, byddai’n ddefnyddiol ehangu ar hyn drwy roi manylion sut y gwnaethoch hyn, beth oedd yn ei olygu a beth oedd canlyniad hyn.

11. Cofnodion Troseddol a Chyflogaeth

Os oes gennych hanes o droseddu, mae’n rhaid i’r Cyngor dderbyn eich caniatâd i wneud cais am ddatguddiad Safonol neu Bellach o’r Swyddfa Cofnodion Troseddol. Am wybodaeth bellach, gweler Nodiadau Canllaw Deddf Ailsefydlu Troseddwyr (1974) (mae’r cyswllt hwn yn agor mewn ffenestr porwr newydd).

12. Geirda

Bydd unrhyw ‘gynnig o gyflogaeth’ a wneir i chi yn amodol ar eirda boddhaol.

Nodwch enw, cyfeiriad a swyddi dau ganolwr a all gadarnhau eich cymeriad a’ch gallu. Sicrhewch mai’ch cyflogwr presennol yw o leiaf un ohonynt (neu’r cyflogwr diwethaf os ydych yn ddi-waith).

Os nad ydych wedi cael eich cyflogi erioed o’r blaen, rhowch fanylion athro neu ddarlithydd sy’n eich adnabod yn ddigon da i allu rhoi sylwadau ar eich gallu i wneud y swydd.

Os nad oes gennych unrhyw brofiad blaenorol, rydych yn newydd i’r wlad neu nid yw’r cwmni y buoch yn gweithio iddo bellach yn bodoli, byddai geirda gan unigolyn na fu’n gyflogwr i chi yn dderbyniol (e.e. eich meddyg, cyfreithiwr neu gyn-athro).

Nid ydym yn derbyn geirda gan berthnasau, partneriaid neu Aelodau Etholedig.

13. Perthnasau ag Aelodau Etholedig y Cyngor

I sicrhau gwrthrychedd wrth ddewis staff, rhaid datgan unrhyw berthnasau ag Aelodau Etholedig neu swyddogion yn yr adran hon (h.y. maent yn berthnasau agos neu rydych yn rhannu ty â nhw).

14. Datganiad Gwarchod Data

Fel Rheolwr Data dros y Ddeddf Gwarchod Data (1998), mae Cyngor Bwrdeistref Sirol Wrecsam yn gyfrifol am wneud penderfyniadau ynghylch sut y prosesir eich data personol a sut y gellir ei ddefnyddio.

Cyfrinachedd Gwybodaeth Bersonol
Bydd eich ffurflen gais yn cael ei thrin yn gyfrinachol bob amser. Dim ond y personél sy’n gysylltiedig â’r broses recriwtio a dewis fydd yn gweld ei chynnwys.

Bydd rhywfaint o benderfyniadau awtomatig yn cael eu gwneud yn y broses ddewis, fodd bynnag, panel staff sy’n gwneud y penderfyniadau recriwtio. Os byddwch yn derbyn swydd, bydd eich gwybodaeth bersonol yn cael ei chadw ar gyfer pwrpasau sy’n ymwneud â’ch Cytundeb Cyflogaeth yn unig.

Diogelwch Gwybodaeth Bersonol
Mae amddiffyniadau diogelwch yn eu lle i warchod eich manylion. Dim ond staff personél penodol all gael mynediad ato, boed bod eich ffurflen gais yn cael ei phrosesu gan gyfrifiadur neu â llaw.

Os na fydd eich cais yn llwyddiannus, bydd y manylion a roddwyd gennych ar-lein yn cael eu dileu.

Mae’n bosibl y byddwn yn cadw gwybodaeth bersonél ar gyfer pwrpas monitro. Gellir dod o hyd i fwy o wybodaeth ynghylch diogelwch data personol ar y ffurflen gais.

15. Datganiad

Os byddwch yn derbyn gwahoddiad i ddod i gyfweliad, bydd raid i chi lofnodi eich ffurflen gais â llaw fel datganiad swyddogol bod y wybodaeth rydych wedi’i nodi’n gywir.

Mae’r ffurflen gais yn cynnwys mwy o wybodaeth ynghylch y datganiad hwn.

16. Cyflwyno eich Cais

Sicrhewch eich bod wedi cwblhau pob adran ar y ffurflen – os nad ydych chi, mae’n bosibl na fydd eich cais yn ddilys.

Rydym yn derbyn ceisiadau hyd at a chan gynnwys y dyddiad cau a nodwyd ar yr hysbyseb. Sicrhewch nad yw’r dyddiad cau ar gyfer y swydd wedi mynd heibio.

Os ydych chi’n fodlon bod eich ffurflen yn gyflawn a bod y wybodaeth sydd arni’n gywir, rydych nawr yn barod i’w hanfon at y Cyngor.

Gellir cael manylion pellach ynghylch y cyfleuster ar-lein hwn ac eraill (e.e. achub eich ffurflen) ar waelod y ffurflen gais hon.

^ yn ôl i'r brig

Pob lwc!

Beth sy’n digwydd nesaf?

Pan fyddwch wedi cyflwyno eich cais ac mae’r dyddiad cau wedi mynd heibio, bydd y broses ganlynol yn digwydd:

Rhestr Fer – Bydd yr ymgeiswyr y mae’n ymddangos eu bod yn gallu cyflawni’r anghenion hanfodol/dymunol a nodir yn Manylion yr Unigolyn yn derbyn gwahoddiad i fynychu cyfweliad ffurfiol. Gellir profi eu gwybodaeth a phrofiad ayb. yn erbyn yr ymgeiswyr eraill.

Proses Hysbysu – Mae’r dyddiad cau ar yr hysbyseb swydd yn bwysig. Bydd yn rhoi syniad i chi pryd y dylech dderbyn ymateb (drwy ebost) i’ch ffurflen gais neu ddyddiad cyfweliad.

Cyfweliad – Bydd y gofynion ar Manylion yr Unigolyn yn cael eu cymharu â’r dystiolaeth a ddarperir gan yr ymgeisydd. Mae ochr dde Manylion yr Unigolyn yn cynnwys colofn “Sut y Nodwyd” hefyd.

Gall tystiolaeth am y meini prawf hanfodol fod ar ffurf:

• Manylion ar eich ffurflen gais
• Eich ymatebion i gwestiynau a luniwyd yn benodol yn y cyfweliad
• Gweld eich Tystysgrifau Addysg/Proffesiynol

Neu ffyrdd eraill, megis:

• Cwestiwn cyflwyniadol – gan ddefnyddio testun perthnasol ar gyfer trafod
• Profi Seicometreg, e.e. profi dawn
• ‘Ymarferion Mewnflwch' e.e. prawf teipio i fesur cyflymder a chywirdeb

Y penderfyniad – Bydd ymgeisydd yn cael ei benodi yn rhinwedd haeddiant.

^ yn ôl i'r brig

Gweler hefyd cwestiynau a ofynnir yn aml ar gyfer Ymgeiswyr Swyddi gyda Chyngor Bwrdeistref Sirol Wrecsam >>

Os oes gennych unrhyw gwestiynau pellach ynghylch y swydd hon neu’r broses y dylid ei dilyn, siaradwch â’r ‘enw cyswllt’ neu’r Adran Bersonél (rhif ffôn ar yr hysbyseb swydd).

Gweler hefyd:

 Gwybodaeth am ymweld, byw a gweithio yn Wrecsam

Rhithdaith 360° o Wrecsam

Ffeithiau, ffigyrau ac ystadegau allweddol am Wrecsam