Gorchymyn Cadwraeth Coed (GCC)

Mae'r ddeddfwriaeth sy'n ymwneud â Gorchmynion Cadwraeth Coed wedi ei gynnwys yn y Ddeddf Gynllunio Gwlad a Thref 1990. Mae'r nodiadau canlynol yn gweithredu fel crynodeb o'r ddeddfwriaeth. Cysylltwch â Chynllunio Amgylcheddol am wybodaeth bellach.

Beth yw GCC?

Mae Gorchymyn Cadwraeth Coed (GCC) yn orchymyn gan yr Awdurdod Cynllunio Lleol (ACLl) yn ymwneud â choed. Mae'r gorchymyn yn ei gwneud hi'n drosedd i dorri, codi o'r gwraidd, tocio, niweidio neu ddifa'r goeden neu'r coed dan sylw. Gall GCC gyfeirio at goeden unigol, twr o goed neu goetir. Gall GCC gyfeirio at goed yn unig nid llwyni, prysgwydd neu wrychoedd (oni bai fod y gwrych wedi dychwelyd i linell o goed unigol). Gall y goeden gyda'r gorchymyn arni fod o unrhyw oedran, maint neu rywogaeth.

Gall yr Adran Gynllunio osod GCC os yw'n ystyried bod y goeden â gwerth hamdden i'r ardal o'i chwmpas, ac y byddai ei cholli yn effeithio'n arwyddocaol ar yr amgylchedd a'i fwynhad gan y cyhoedd. I'r perwyl hwn, fel rheol byddai'r goeden (coed) i'w gweld o fan cyhoeddus a byddai'n cyfrannu at y dirwedd mewn rhyw fodd. Mae'n rhaid i'r Adran Gynllunio gyfiawnhau gosod GCC a gall perchennog y goeden wrthwynebu i osodiad gorchymyn o'r math.

Nid yw GCC yn golygu mai'r Cyngor sydd nawr yn berchen ar y goeden, ac nid yw'n golygu ei fod yn gyfrifol am gost ei chynnal a'i chadw ychwaith!

Mae'n bwysig peidio â drysu coed sydd â GCC arnynt gyda choed wedi'u lleoli o fewn Ardaloedd Cadwraeth; mae'r ddeddfwriaeth yn gwbl wahanol.

Efallai hefyd y bydd angen caniatâd os am dorri coed o fewn coetiroedd a choedwigoedd gan y Comisiwn Coedwigaeth. Gellir cael gwybodaeth bellach o'r daflen "Torri Coed - Derbyn Caniatâd', sydd ar gael o'r dderbynfa yn Stryt Lampint, neu drwy gysylltu â Cynllunio Amgylcheddol.

Eithriadau

Mae GCC yn bodoli er mwyn rhwystro unrhyw un rhag torri neu docio'r goeden heb ganiatâd yr Adran Gynllunio. Nid yw hyn o angenrheidrwydd yn golygu na chewch chi dorri neu docio y coed yn y pen draw, ond yn hytrach bod yn rhaid i chi dderbyn ein caniatâd yn gyntaf.

Mae eithriadau i'r Ddeddf sy'n caniatáu i berchennog y goeden gwblhau gwaith heb ganiatâd. Mae hyn yn ymwneud â thorri'r coed marw neu beryglus neu rannau o goed. Enghraifft gyffredin fyddai tynnu pren marw (canghennau marw). Byddai perchennog coeden yn ddoeth yn rhoi 5 diwrnod o rybudd cyn torri coeden, y maent yn ei hystyried yn beryglus, wedi marw, neu yn marw; oni bai fod angen cwblhau'r gwaith ar frys. Cyfrifoldeb perchennog y goeden yw darparu tystiolaeth bod y goeden yn farw neu'n beryglus os yw'r eithriad yn cael ei gwestiynu; gan hynny, mae bob amser yn ddoeth gofyn am archwiliad gan Swyddog Coed Lleol cyn torri'r goeden.

Mae eithriadau eraill yn cynnwys materion megis gwaith Cwmnïau Darparu Gwasanaethau, coed ar Feysydd Awyr, Systemau Amddiffyniad, Caniatâd Cynllunio.

Cosb

Mae'r llysoedd â grym dirwyo unrhyw un sy'n torri GCC. Mae uchafswm y ddirwy am ddinistrio coeden yn £20,000 a hyd at £2,500 i unrhywun sydd wedi gweithio ar goeden heb ganiatâd ond heb ei dinistrio'n gyfan gwbl. Nid yw o amddiffyniad os yw'r diffynnydd yn pledio nad oedd ymwybodol bod GCC yn bodoli ar y goden o dan sylw, oni bai mai'r Cyngor a oedd achos yr anwybodaeth.

Gwaith, Gwrthwynebiad ac Apêl

Unwaith y bydd y Cyngor wedi cyflwyno'r rhybudd cyntaf, rhaid gwrthwynebu i'r Gorchymyn Cadwraeth Coed yn ysgrifenedig o fewn 28 diwrnod. Rhaid i'r Cyngor gadarnhau'r GCC o fewn 6 mis er mwyn iddo fod yn barhaol, fel arall bydd yn ddi-rym (gall y Cyngor ei gadarnhau'n ddiweddarach).

Rhaid i unrhywun sy'n dymuno cwblhau gwaith ar goeden wneud cais ysgrifenedig, gan nodi'r rhesymau am wneud y cais, y gwaith sydd ei angen a'i gwneud yn glir at ba goed y mae'r gwaith yn gyfeirio. Dylai'r Adran Gynllunio ymateb i geisiadau o fewn cyfnod o 2 fis (8 wythnos). Os yw'r Cyngor yn gwrthod caniatau'r gwaith gall yr ymgeisydd apelio i'r Ysgrifennydd Gwladol; fel arfer gwneir hyn o fewn 28 diwrnod.

Gellir apelio ynglyn â rhesymau eraill megis:

• amodau a osodwyd gydag unrhyw ganiatâd,

• tystysgrif Erthygl 5, neu

• fethiant y Cyngor i ymateb i'r cais o fewn 2 fis.

Nodwch yma ar gyfer Ffurflen Gais i weithio ar goed sydd wedi eu cynnwys o fewn Gorchymyn Cadwraeth Coed, ar gael ar ffurf PDF a Word.

Unwaith y byddwch wedi argraffu a chwblhau'r ffurflen byddwch angen ei hanfon at y cyfeiriad isod:

Cysylltwch â: Chynllunio Amgylchedd, Adran Cynllunio, Stryt y Lampint, Wrecsam, LL11 1WL. Ffôn: 01978 292019.
Ffacs: 01978 292502. E-bost: planning@wrexham.gov.uk

Bioamrywiaeth

Cynllunio Amgylchedd