 Ffair Fictoraidd ar ddydd Sadwrn 23ain Mehefin 2007
Bydd Cyngor Bwrdeistref Sirol Wrecsam yn dathlu 150 mlynedd ers derbyn Siarter Brenhinol a greoedd bwrdeistref Wrecsam drwy gynnal Ffair Fictoraidd ar ddydd Sadwrn 23ain Mehefin 2007.
Bydd y digwyddiad yn cynnwys ystod eang o weithgareddau a fyddai wedi bod yn boblogaidd yn oes Fictoria. Bydd sgwrs â chymeriad Fictoraidd, cyfle i roi cynnig ar grefft Fictoraidd megis decoupage, a gwylio sioe hudlusernau.
Bydd awyrgylch garddwest Fictoraidd yn cael ei ail-greu ar Llwyn Isaf, gyda pherfformiadau o safle’r seindorf drwy’r dydd, pabell luniaeth a gemau Fictoraidd traddodiadol i’r plant chwarae. Gellwch hefyd weld atgynhyrchiad o falwn aer poeth Montgolfier er mwyn darganfod am pa mor galed oedd hedfan yn oes Fictoria.
Yn ogystal ag adloniant ac arddangosfeydd bydd amryw o stondinau marchnad ar Sgwâr y Frenhines yn gwerthu bwyd a chrefftau.
Bydd Hysbys y BBC hefyd yn bresennol i gofnodi profiadau pobl o’r digwyddiad a gellwch ganfod mwy am hanes eich ardal gan un o’r llu o grwpiau hanes lleol yn y Fwrdeistref Sirol.
Dywedodd Alan Watkin, Prif Swyddog Hamdden, Llyfrgelloedd a Diwylliant "Gobeithiwn y daw llawer o bobl i’r dref ar y diwrnod arbennig hwn i Wrecsam. Rydym wedi neilltuo bob math o gymeriadau ac atyniadau diddorol felly bydd digon i’w weld a’i wneud - gellwch wylio sioe Pwnsh a Jiwdi , profi eich sgiliau wrth daflu cnau cocos, eistedd ar gefn beic peni-ffarddin a chael tynnu eich llun arno (os ydych yn ddigon ystwyth i ddringo i’r set), gwylio crefftwyr Fictoraidd wrth eu gwaith a llawer, llawer mwy."
Cynhelir y Ffair Fictoraidd rhwng 11am a 4pm ddydd Sadwrn 23ain Mehefin a bydd yn cael ei agor yn swyddogol am 11am gan Faer Anrhydeddus Wrecsam, y Cynghorydd Mrs Joan Lowe.
Am wybodaeth bellach cysylltwch â Hazel Hawarden, Swyddog Diwylliant a Threftadaeth yr Adran Hamdden, Llyfrgelloedd a Diwylliant ar 01978 297440 neu Kay Rickard, Cydlynydd y Tîm Digwyddiadau, Adran Datblygiad Economaidd ar 2929536 tourism@wrexham.gov.uk.
Digwyddiadau eraill yn y rhaglen i ddathlu 150 mlynedd
- Ymunwch â’r gwasanaeth dinesig a gynhelir yn Eglwys Blwyf San Silyn am 3pm ddydd Sul 24 Mehefin.
- ‘Newid Oes, Newid Lle’, arddangosfa gan Amgueddfa Bwrdeistref Sirol Wrecsam sy’n dangos sut mae bywyd wedi newid dros y 150 mlynedd ers i Wrecsam ddod yn fwrdeistref. Ar agor o 23 Ebrill i 7 Gorffennaf: 10.00am i 5.00pm o ddydd Llun i ddydd Gwener a 10.30am i 3.00pm ar ddydd Sadwrn. Mynediad am ddim.
- ‘Cadwyni Aur’, gweithgaredd gwyliau i blant sy’n 5-9 oed i wneud cadwyn aur fawr. 10.30am hyd 12 canol dydd yn Amgueddfa Bwrdeistref Sirol Wrecsam. Cost £2 y plentyn.
Cefndir Hanesyddol
Cafodd y Siarter Brenhinol i greu bwrdeistref Wrecsam ei ganiatáu ar 13eg Mai a daeth i rym ar 23ain Medi 1857. Roedd y fwrdeistref newydd yn cynnwys pob trefgordd, gan gynnwys Llys Wrecsam ac Abad Wrecsam yn ogystal â rhan fechan o Eclusham Isaf. Cynhaliwyd etholiadau ar 5 Tachwedd a bu i’r cyngor newydd gyfarfod gyntaf ar 9 Tachwedd. Bu i’r 12 cynghorydd a’r pedwar henadur ethol Thomas Edgworth yn faer.
Ar 1 Ebrill 1935 ymestynnwyd ffiniau’r fwrdeistref i gynnwys Acton, Stansty, a rhannau o blwyfi Gwersyllt, Broughton a’r Bers.
 David Higgins, Rhingyll y Byrllysg. Higgins oedd y byrllysgwr cyntaf a benodwyd yng Nghyngor y Fwrdeistref. Ef oedd Arolygydd Niwsans cyntaf y Cyngor hefyd (Swyddog Iechyd yr Amgylchedd y 19eg ganrif) a'r Arolygydd Lletyau Cyffredin cyntaf.
Rhoddodd Cyngor y Fwrdeistref Ryddid y Fwrdeistref am y tro cyntaf yn 1906. Yn draddodiadol, rhoddwyd Rhyddid y Fwrdeistref i'r rheiny a oedd wedi gwasanaethu'r Fwrdeistref yn dda. Yn 1923, rhoddodd y Cyngor y rhyddid i David Lloyd George, cyn Brif Weinidog a Changhellor y Trysorlys.
Cyfunwyd Cyngor Bwrdeistref Wrecsam a Chyngor Dosbarth Gwledig Wrecsam yn 1974 i greu Cyngor Bwrdeistref Maelor Wrecsam ac yn 1996 crëwyd y Cyngor Bwrdeistref Sirol Wrecsam presennol.
 Maeryddiaeth | Amgueddfa Wrecsam
|
English
Yn ôl i'r brig