Arolygiadau Glanweithdra Bwyd

Wrecsam yn cyhoeddi canlyniadau arolygiadau glanweithdra bwyd

Mae Cyngor Bwrdeistref Sirol Wrecsam wedi cyflwyno system sêr ar ei wefan sy'n caniatáu'r cyhoedd i weld canlyniadau arolygiadau glanweithdra bwyd a wnaed yn ardal Wrecsam yn ddiweddar.

Cronfa Ddata Glanweithdra Bwyd
Mae'r rhestr adeiladau gyfredol yn cyfeirio at archwiliadau a gynhaliwyd ers 1af Medi 2006 ac fe'i diweddarir yn rheolaidd.

Ar hyn o bryd, dan y Ddeddf Rhyddid Gwybodaeth, mae gan unrhyw un yr hawl i ofyn am wybodaeth am fannau bwyd a gweld unrhyw adroddiadau a anfonwyd.  Mae'r cynllun hwn yn caniatáu i unrhyw un weld y wybodaeth ond mewn ffordd sy'n haws ei deall.

Beth yw'r manteision?

I'r cyhoedd

Anela'r cynllun newydd at godi safonau glanweithdra bwyd i gwsmeriaid ac mae'n rhoi cyfle i'r cyhoedd wneud dewisiadau call am ble maent yn bwyta neu brynu bwyd, yn seiliedig ar ddiogelwch bwyd. 

I fusnesau

Mae'r cynllun yn hysbyseb dda am safonau uchel o lanweithdra a allai wella busnes a'u gwobrwyo am eu hymdrechion.  Mae sawl awdurdod lleol ledled y wlad yn cymryd rhan yn y cynllun sy'n cael ei alw'n "Sgorau ar Ddrysau" ar hyn o bryd.

Sut mae'r cynllun yn gweithio

Gofynnir i'r Cyngor arolygu'r holl fusnesau sy'n gweini, paratoi neu werthu bwyd a gwneir hyn gan swyddogion iechyd amgylcheddol a swyddogion diogelwch bwyd sy'n meddu ar y cymwysterau a'r awdurdod i wneud yr arolygiadau hyn.  Ar adeg yr arolygiad, asesir busnesau yn erbyn ystod o feini prawf gan gynnwys cydymffurfiad â deddfwriaeth glanweithdra bwyd.  Mae swyddogion yn asesu eu hyder mewn rheoli'r busnes hefyd.  Mae'r asesiad hwn yn arwain at sgôr a ddefnyddir i benderfynu pa mor aml y dylid arolygu'r eiddo.  Defnyddir y sgôr nawr i gyfrif marc sêr y cynllun hefyd.

Sylwer mai dim ond eiddo mawr neu eiddo sy'n trin neu sy'n paratoi bwyd risg uchel a fydd yn rhan o'r cynllun ac mae hyn yn eithrio siopau papur, canolfannau cymuned a thafarndai nad ydynt yn gwerthu bwyd felly.

Y system sgorio

Caiff pob busnes sgôr yn unol â'r tri phwynt canlynol:

Glanweithdra a diogelwch bwyd

Pa mor dda y caiff bwyd ei drin, glendid yr eiddo.

Strwythur 

Cyflwr y strwythur, trwsio, goleuadau, awyru, diogelu rhag plau.

Hyder yn y Rheolaeth

Tystiolaeth o system rheoli bwyd, hanes o gydymffurfiad, agwedd gyffredinol y rheolwyr. 

Mae'r sgôr yn arwain at roi un o'r marciau sêr canlynol:

5 seren = Safonau glanweithdra rhagorol.  Safonau uchel o gydymffurfiad â deddfwriaeth bwyd.  Hyder uchel yn y rheolwyr.  Gwobr glanweithdra bwyd aur.

4 seren = Safonau glanweithdra uchel iawn.  Lefel dda iawn o gydymffurfiad.  Hyder yn y rheolwyr.  Gwobr glanweithdra bwyd arian.

3 seren = Safonau da o lanweithdra.  Rhai mân-doriadau.  Record rhesymol o gydymffurfiad.  Gwobr glanweithdra bwyd efydd.

2 seren = Ychydig o beidio â chydymffurfio â materion glanweithdra.  Hyder boddhaol yn y rheolwyr.  Safonau'n cael eu cynnal.

1 seren = Angen mwy o ymdrech. Gwerthfawrogiad drwg o beryglon.

0 seren = Safonau isel yn gyffredinol. Gwerthfawrogiad prin o lanweithdra bwyd.

Os hoffai perchennog busnes bwyd wneud sylwadau ar y sgorau y maent wedi eu cael, mae 'hawl i ymateb' ar gael ar y wefan.  Gallai hyn fod yn ddefnyddiol os gwnaed gwaith gwella ar yr eiddo ers yr arolygiad diwethaf.  Fodd bynnag, bydd y marciau sêr yn dal i fodoli hyd nes yr arolygiad cynlluniedig nesaf.