Cyngor ar sut i gompostio'n llwyddiannus yn y cartref

Beth allaf ei roi yn fy min compost?

Mae'r micro-organebau a'r pryfetach sy'n ymddatod sylweddau organig yn eich tomen gompost neu'ch compostiwr yn gweithio orau os rhoddir cymysgedd o ddeunyddiau o bob un o'r ddwy restr isod:

Deunyddiau gwlyb:

Gwastraff ffrwythau
Croen llysiau
Bagiau te
Coffi mâl
Blodau wedi marw
Glaswellt
Chwyn
Planhigion ffres
Gweddillion tocio
Toriadau gwrychoedd
Tail
Gwastraff anifeiliaid anwes llysysol
Ychydig o bridd o'r ardd

Deunyddiau sych

Papur wedi'i dorri'n fân
Blychau wyau
Cardbord
Pecynnau carbord
Papur cegin wedi'i ddefnyddio
Blew anifeiliaid anwes
Gwely hamster / mochyn cwta
Gwastraff yr ardd wedi'i droi'n sglodion
Gwastraff yr ardd wedi'i dorri'n fân
Llwch o sugnwr llwch
Gwellt
Llwch llif
Dail wedi marw
Brigau

Ceisiwch ychwanegu symiau cymharol fach o bob deunydd i'ch tomen neu'ch compostiwr bob tro er mwyn cael cydbwysedd da o ddeunyddiau gwlyb a sych. Bydd hyn yn gwneud i'r gwastraff ymddatod yn gynt.

Os gwneir hyn, ni ddylai fod angen troi'r cynnwys gyda fforch gan y bydd organebau naturiol yn gwneud y gwaith hwnnw i chi.

Beth na allaf ei roi yn fy min compost?

Baw cathod / cŵn
Gweddillion ar blatiau
Cerdyn sgleiniog neu gylchgronnau lliw
Gwrthrychau nad ydynt yn pydru
Cig (wedi'i goginio nac yn amrwd)
Clytiau tafladwy
Planhigion wedi marw
Hancesi papur

Pa mor hir fydd y deunydd yn ei gymryd i ymddatod

Mae hyn yn dibynnu ar yr adeg o'r flwyddyn a'r hinsawdd. Yn ystod cyfnodau o dywydd cynnes mae'n bosibl y bydd compostiwr llawn deunyddiau'n dal i fyny â'r broses ymddatod wrth i chi ychwanegu deunyddiau heb ei orlenwi. Os oes gennych ddigon o le, mae'n syniad da cael mwy nag un compostiwr fel y gallwch adael un i ymddatod tra bo'r llall yn llenwi.

Cyn bo hir, bydd gennych ffynhonnell o gyflyrydd pridd buddiol i'w ddefnyddio yn eich gardd heb fod angen prynu compost sy'n cynnwys mawn.

Gall gerddi bach gompostio hefyd

Hyd yn oed os oes gennych ardd fach heb le i ddefnyddio cyflyrydd pridd, mae gennych le ar gyfer compostiwr cartref a gallwch ei ddefnyddio ar gyfer gwastraff o'r gegin a'r cartref fel y disgrifir yn y rhestrau uchod heb ei lenwi’n rhy gyflym.

Byddwch yn gadael mwy o le yn eich bin du ar gyfer sbwriel arall nad oes modd ei ailgylchu a chyfrannu'n sylweddol at ddargyfeirio gwastraff o domenni gwastraff.

Pam ddylwn i ddefnyddio compostiwr cartref os oes gennyf fin gwyrdd?

Compostio yn y cartref yw'r ffordd orau o ddelio â gwastraff yr ardd a gwastraff addas o'r gegin gan ei fod yn lleihau'r defnydd o garbon wrth gludo a phrosesu gwastraff y biniau gwyrdd. Compostiwch yn y cartref yn gyntaf a defnyddiwch y bin gwyrdd ar gyfer pethau fel glaswellt dros ben, chwyn lluosflwydd a gwastraff planhigion pren na ellir ei gompostio yn y cartref. Cofiwch fod y gyfraith yn nodi NA DDYLID RHOI GWASTRAFF Y GEGIN MEWN BIN GWYRDD.

Y rhif ffôn yw 01978 298989 a bydd galwadau'n costio'r un faint â galwadau lleol.