Strategaeth Tai Pobl Ddu a Lleiafrifoedd Ethnig ar gyfer Gogledd Cymru

Ym Medi 2002, cyhoeddodd Llywodraeth Cynulliad Cymru’r Cynllun Gweithredu i Gymru ar Dai i Bobl Dduon a Lleiafrifoedd Ethnig. Mae’n ddisgwyliedig, yn ôl y ddogfen hon, i’r holl landlordiaid cymdeithasol yng Nghymru gynhyrchu Strategaeth Tai i Bobl Dduon a Lleiafrifoedd Ethnig erbyn Ebrill 2004. Unodd chwe sir Gogledd Cymru (Ynys Môn. Conwy, Sir Ddinbych, Sir y Fflint, Gwynedd a Wrecsam) i ddarparu’r Strategaeth Ranbarthol hon.

Credwn fod digon o debygrwydd rhwng y siroedd o fewn y rhanbarth i gyfiawnhau fframwaith cyffredin, rhanbarthol. Dyma’r pwyntiau sy’n ymdebygu i’w gilydd yn y chwe sir:

Poblogaeth o bobl dduon a lleiafrifoedd ethnig (BME) sy’n amrywiol, ar wahân ac yn wasgaredig.
Canran fach iawn o bobl BME o gymharu â gweddill y DG.
Ychydig o hanes am bobl BME yn symud ac yn setlo wrth chwilio am waith.
Cymuned amrywiol a nifer sylweddol ohonynt yn bobl broffesiynol, pobl fusnes a myfyrwyr.
Dim nifer sylweddol o geiswyr lloches na ffoaduriaid.
Diffyg ymwybyddiaeth yn gyffredinol am faterion BME o fewn y boblogaeth ac yn yr awdurdodau lleol a sefydliadau eraill.
Awdurdodau lleol â pholisïau, strategaethau ac ymwybyddiaeth heb eu datblygu’n llawn.

Bydd gan bob awdurdod Gynllun Gweithredu Pobl Dduon a Lleiafrifoedd Ethnig (BME) ei hun yn rhan o’r strategaeth ranbarthol hon. Y rheswm am hyn yw fod rhai gwahaniaethau rhwng ethnigrwydd pob sir, ac yn amodau lleol pob sir ac felly rhaid wrth gynllun gweithredu unigoli bob un. Hefyd amrywia’r siroedd o ran cyflawni eu strategaeth cydraddoldeb hiliol. Mae gan Adrannau Tai Sir y Fflint a Wrecsam, er enghraifft, ill dwy strategaeth cydraddoldeb, ac mae eu cynlluniau gweithredu mewn fformat gwahanol.

Mae’n bwysig, hefyd, i bob awdurdod, y staff a’r aelodau etholedig berchnogi strategaeth y bydd tenantiaid a phreswylwyr yn medru perthnasu â hi ac y bydd yr awdurdod a’r aelodau etholedig yn atebol iddi.

Wrth gynllunio’r strategaeth hon, rydym yn ofalus iawn fod cydraddoldeb ac amrywiaeth yn cynnwys, nid yn unig ethnigrwydd, ond hefyd anabledd, rhyw, crefydd, oed a rhywioldeb. Nid yw hyn yn fater o wyro oddi wrth bwrpas cyffredinol Strategaeth BME, ond yn hytrach osgoi gadael allan grwpiau eraill sydd ar yr ymylon yn y gymuned.

Mae gan Heddlu Gogledd Cymru agenda amrywiaeth sy’n cynnwys materion sy’n ymwneud â rhywioldeb a maent wedi mynegi dymuniad i’n strategaeth ni fod mor gynhwysfawr ag y bo modd.

Strategaeth Tai Pobl Ddu a Lleiafrifoedd Ethnig ar gyfer Gogledd Cymru.